De saba jake rasool e arabi ko ye payam
Ae huzur aap pe dunia k durood aur salam
Saya e gumbad e khizra me kaha tak aaram
Uthiye Uthiye k ayan hashr k saaman hai tamam
Gazab e hazrat e bari ki farawani hai
Sang e buniyad e zameen kashti e tufani hai
De saba jake…
Zalzale aatay hain paiham dil e geti hai gudas
Seena e khaak se aati hai bhayanak awaz
Ab nahi zer e falak amn ki rahay kahi baar
Nazm E aalam pe zawwal aata hai ae banda nawaz
Apne mehvar pe chale arz ye maqdur nahi
Taqta duniya ka ulat jaye to kuch dur nahi
De saba jake…
Chaai jati hai jahan par dil e mazlum ki aah
Aandhiyan gosha e sahra se uthi surkh o syah
Khoon k dhabbe hain ruq e mehr pe matam k gavah
Paani darya ka uchalta hai k khaliq ki panah
Dasht ki kankariya khoon ki bu deti hain
Shaakhein kaato jo shajar se to lahu deti hain
De saba jake…
Manzilen maare hue ek watan awara gareeb
Aakay tahra tha lab e nahar k rahat ho naseeb
Bahre aada ko satane ki ye suji tarkeeb
Usko rehne na diya chashma e jaari k qareeb
Taab o tab ka koi sathi jo gila karta hai
Paikar e sabr o raza shukr e khuda karta hai
De saba jake…
Dahum e maah e muharram ki hikayat hai saqi
Dil hua jata hai seene me tasavvur se doneem
Ummati bhul gaye aapki roshan taleem
Shimr e badbakht hua murtakib e zibh e azeem
Pad gayi oos sharafat k gulistano par
Bijliya gir gayi tahzeeb k kaashano par
De saba jake…
Hoorein jannat se nikal aayi hain karti hui bain
Shiddat e girya se hai arsh pe qudsi bechain
Haatif e ghaib nida deta hai ba sevan o shain
Rabbena qad qutulal sibt e rasulus saqlain
Sar se jibreel to mindeel giraye hue hain
Soor hoton se sarafeel lagaye hue hain
De saba jake…
Kahi ye kishwar e islam ka rahbar to nahi
Naaz hai jispe chaman ko wo guletar to nahi
Dekhiye dekhiye ye aapka dilbar to nahi
Pisar e fatima lakht e dil e haidar to nahi
Kyu zameen shev k naalo se hili jaati hai
Shab se kyu naala e zahra ki sada aati hai
De saba jake…
Lije wo aag lagi qaimo se utha wo dhuan
Bache dam ghutne se ghabra k wo nikle naadan
Khoon e taaza kisi masum k kaano se rawan
Jeb o daaman kisi masum ka hai shola fishan
Ae chacha aaiyay jaldi koi chillata hai
Haaye baba koi kah kah k mua jaata hai
De saba jake…
Chand kheme jo nazar aatay hain reti pe ujaad
Jinke jhuk padne se zaahir hai muqaddar ka bigaad
Bibi ek unme se nikli hai na parda hai na aad
Wa hussaina ki sada deti hai kha kha k pachad
Shaukat e Fitrat e masum nazar aati hai
Surat e Zainab e maghmoon nazar aati hai
De saba jake…
Koi kahti hai mera mehr e munawwar hai kaha
Arey logo hasan e pak ka dilbar hai kaha
Koi chillati hai abbas e dilawar hai kaha
Dusri kahti hai haye haye ali akbar hai kaha
Koi maa kokh jali jaan e hazin khoti hai
Haaye asghar kabhi kahti hai kabhi roti hai
De saba jake…
AZAAKHAANA 