Wo karbala wo shaam-e-gharibaa’n wo teergi,
Wo Zainab-e-Hazee’n wo hifazat khayaam ki,
Aaya wo ek sawaar qareeb-e-khayaam-e-Shaah,
Beti Ali ki ghaiz mein suwe faras badhi,
Ulti naqab chehre se apne sawaar ne…..
Pesh-e-nigaah Zainab-e-Mazloom thay Ali…..
Har chnd Sabira thi bahot Binte Fatima..,
Besakhta Zabaa’n pe ye fariyaad aa gayi…..
Zainab ne kaha baap k qadmo’n se lipat kar
Ab aaye ho Baba…….
Jab lut gaya pardes mein amma ka bhara ghar
Ab aaye ho Baba…….
Baba agar aana hi tha Khaliq ki reza se, Uswaqt na aaye
Jab khaak pe damm tod raha tha mera Akbar
Ab aaye ho Baba…….
Katt katt k gire naher pe jab Bazu-e-Abbas, Aur koi na tha paas
Uswaqt sada aapko deta tha dilawar
Ab aaye ho Baba…….
Jab farsh-e-zamee’n baam-e-falak larza baja thay, Uswaqt kahan thay?
Jab baap ke chullu mein tha khoon-e-Ali Asghar
Ab aaye ho Baba…….
Jab Bhai ka sar kat’ta tha mai dekh rahi thi, Hazrat ko sada di
Sar khole hue roti thi mai khaime ke darr par
Ab aaye ho Baba…….
Jab log bacha le gaye laashe shohda ke, Haqq apna jata ke
Bas ek tan-e-Shabbir tha pamali ki zadd par
Ab aaye ho baba…….
Jab Bali Sakina k gohar chheene gae thay, Lagte thay tamache
Hasrat se mujhse dekhti thi Banu-e-Muztar
Ab aaye ho Baba…….
Jab Shaam ke qazzaab hame loot rahe thay, Khaimo’n ko jala k
Aap aa gaye hote to na chhinti meri chaadar
Ab aaye ho Baba…….
Kya aapne firdaus se ye dekha na hoga, Kya hashr bapa tha
Jab pusht se beemar ki kheecha gaya bistar
Ab Aye Ho Baba…….
Ek raat k mehmaan hain phir qaid-e-silasil, Ab aane se haasil?
Bazaar mein hum subho ko jaenge khule sar
Ab aaye ho Baba……
AZAAKHAANA 